Prevemos iniciar a actividade da cooperativa en marzo de 2015 e a partir dese momento comezar tamén a percibir os nosos salarios (anticipo societario).

Fotografías: Tomás Montes

Desde xuño deste ano somos socios en Coop57, unha cooperativa de servizos financeiros creada polos traballadores da editorial Bruguera en 1996 coas indemnizacións que cobraron despois de gañar o xuízo por despido. Esta cooperativa finánciase coas achegas dos seus socios e as contribucións e intereses sobre a devolución dos préstamos que concede, sen ningún tipo de comisión engadida, o que nos permite non depender de ningún banco.

Unha vez que Coop57 avalíe positivamente o noso proxecto de viabilidade segundo as súas consideracións (ter interese social, vinculación co territorio e funcionamento con criterios de xestión democrática e autonomía, ser viábel economicamente, ter capacidade suficiente para retornar o importe do préstamo solicitado e ter carácter non lucrativo), estaremos en condicións de solicitar o crédito que precisamos.

Nace como proxecto de autoemprego dos seus socios fundadores a través da creación dun espazo que favorecerá a confrontación de ideas, o encontro e o debate mediante a prestación e xestión de servizos e produtos culturais, artísticos e educativos.

Collemos o noso nome da fábrica de electrodomésticos que Joaquín Jordà filmou en ‘Numax presenta…’ no ano 1979.

O proxecto baséase na redistribución e compensación do traballo dos socios entre as súas áreas de actividade. Isto permitirá a viabilidade da única sala de cinema independente en versión orixinal de Galicia, con programación diaria, nun momento no que desapareceron todos os espazos de exhibición cinematográfica do centro da cidade.

NUMAX é unha cooperativa sen ánimo de lucro. Isto significa que se estabelece un tope salarial dun 50% sobre convenio, os cargos directivos non son remunerados e non existe o reparto de beneficios entre os socios (no caso de habelos reinvístense integramente na propia cooperativa)

• Cun aforo de 70 butacas e 70 m² de superficie, o cinema NUMAX estará equipado co último estándar profesional de proxección dixital (DCI 4K), que posibilita a exhibición en todos os soportes de alta definición, converténdose así na única sala estábel do centro de Santiago de Compostela con esta tecnoloxía.
• NUMAX proxectará entre 6 e 8 filmes ao mes, todos eles en versión orixinal subtitulada, distribuídos en 21 sesións semanais, de martes a domingo, que sumarán entre 800 e 1.000 proxeccións anuais.
• A programación prestará especial atención á estrea de obras cinematográficas que aposten pola innovación formal e temática, e que habitualmente non atopan o espazo axeitado nas carteleiras.
• Tamén haberá lugar para sesións destinadas a público mozo ou reposicións de filmes clásicos que estabelezan un diálogo coas propostas máis recentes.

• Seguindo este fin, a sección fixa «NUMAX presenta» organizará, unha vez ao mes, un encontro con realizadores que, ademais de presentar os seus filmes e manter un coloquio cos asistentes, impartirán obradoiros formativos sobre os diversos aspectos do seu traballo.
• Ademais, en NUMAX consideramos a formación do público mozo un dos alicerces sobre os que debera pivotar todo o proxecto. Dentro dos obxectivos a medio prazo da cooperativa está o desenvolvemento, a través do Laboratorio, dun programa formativo estábel para o ensino primario e secundario, «NUMAX na escola», encadrado nas accións de Público Mozo do programa Media e inspirado no modelo francés Lycéens et apprentis au cinéma e no catalán Cinema en Curs.

Contará cunha selección das novidades máis destacadas do panorama editorial, combinadas cun fondo que permita a convivencia entre os distintos títulos do catálogo, de maneira que se creen entre eles diálogos e relacións novas.

En colaboración co cinema NUMAX, creará percorridos bibliográficos que acompañen os filmes programados. Está pensada como unha libraría internacional, na que o fondo galego e castelán conviva cunha selección de libros noutras linguas.

• Modernización. O noso modelo contempla a posta en marcha dunha libraría virtual que axiliza e amplía o noso catálogo físico.
• Produto diferenciado e de calidade, a través dun traballo propio de escolma de títulos nacionais e internacionais, incluíndo aqueles de distribución máis restrinxida.






• Mediación cultural. Unha libraría atenta ao que pasa na cidade, con capacidade de dialogar e abrir novos focos de interese.
• Equipo humano con formación profesional específica e experiencia previa en toda a cadea de valor do libro.
• Servizos. Ofreceremos tamén todo tipo de servizos en función das necesidades de empresas, bibliotecas, centros educativos e institucións.

Ao tempo, o laboratorio NUMAX ofrece servizos a clientes particulares ou empresas que cubren un amplo abano de traballos nos campos do deseño gráfico, a comunicación e a produción audiovisual.

• Deseño. Entendemos o deseño dun xeito transversal, buscando ideas e solucións de comunicación para todos os medios, sexan en papel, en soportes dixitais ou na rúa. Asumimos tamén tarefas de consultoría gráfica e dirección artística.
• Edición. Contamos cunha ampla experiencia na produción de libros e revistas, un terreo sobre o que habemos traballar aproveitando as posibilidades de distribución da nosa librería.
• Vídeo. A nosa dotación tecnolóxica permítenos abranguer todo o proceso de produción de imaxe en movemento, desde a gravación até a edición, postprodución e entrega final do produto no soporte requirido para cada caso. Para traballos que precisen da súa finalización nun soporte físico facémonos cargo da autoría e edición de DVD e BluRay, de todo tipo de transfers dixitais, da conversión e exportación en calquera formato, subtitulado e creación de DCP.
• Formación. A medio prazo ofertaremos cursos especializados de deseño e edición audiovisual, así como calquera outra formación específica relacionada co noso campo e da que detectemos unha demanda.
• Deseño de programacións cinematográficas para as entidades que o requiran.